rda.jpg

Murenzi Kamatari, ni umunyarwanda uba mu mujyi wa New York muri Leta Zunze Ubumwe za Amerika, ndetse azwi no mu Rwanda cyane nka MC Murenzi aho yakoze igihe kirekire kuri Radio Contact FM. Ubwo yageraga muri Leta Zunze Ubumwe za Amerika, hari ibyamuteye agahinda bijyanye n’isura bamwe bari bafite ku Rwanda ariko biza gutuma agira ishyaka ryo kuzenguruka umujyi wa New York afite imodoka igaragaza ko atewe ishema n’u Rwanda. 

 

Hirya no hino ku isi, buri gihugu kigira ibiranga ibinyabiziga (Plaque/Plate) kiba cyarahisemo buri wese utunze imodoka muri icyo gihugu agomba kubahiriza. Icyakoze nanone, umuntu ubishaka kandi ufite ubushobozi bwo kubyishyurira, ashobora kwihitiramo ikirango (Plaque) ashaka imodoka ye ikaba ifite ibirango byihariye. Ibi ninako byagenze kuri Murenzi Kamatari uba muri Amerika, ufite imodoka ifite ikirango cyanditseho "Rwanda", ibintu yakoze nyuma yo guterwa agahinda n’uburyo abanyamahanga bamwe bafataga u Rwanda. 

Mu kiganiro yagiranye n’ikinyamakuru Ukwezi.com, Murenzi yasobanuye uko yatekereje guhitamo ikirango cy’imodoka ye kigaragaza igihugu cye cy’amavuko. Yagize ati: "Nyimaranye imyaka 3, nayishyizeho maze kumva uko abantu inaha bafata u Rwanda ndetse benshi wababwiraga u Rwanda bakumva Film za genocide batazi ko ibyo byarangiye. Rero nafashe icyemezo cyo gushyiraho plate y’u Rwanda kugirango nereke abantu bose ko u Rwanda ari igihugu cyiza kandi n’abakivukamo batewe ishema na cyo"

Murenzi avuga ko amaze gushyirisha ku modoka ye ibi birango bimufasha kugenda mu mujyi wa New York arata u Rwanda nk’igihugu cyamubyaye, yashimishijwe n’uburyo abantu babyakiriye. Yagize ati: "Nabonye ibitekerezo byinshi cyane ku Banyarwanda baba hano, aho nagendaga ntwaye hirya no hino bamwe ngasanga barimo kwifotoza ku modoka abandi ngasanga bayishyize kuri za facebook, instagram n’ahandi ari nako benshi bibaza impamvu nafashe iyo pulake (Plate)... Mu by’ukuri igitekerezo kwari uguha agaciro igihugu cyambyaye nerekana ko aho tuva tuhishimiye kandi haduteye ishema"

Kugirango Murenzi atunge iyi modoka muri Leta Zunze Ubumwe za Amerika, hari amafaranga yishyurira iki kirango buri mwaka ariko ngo yumva abyishimiye. Murenzi ati: "Ni plate nishyura $250 ku mwaka (asaga 215.000 Frw) nkanishyura registration buri mwaka mu gihe abafite izisazwe bo bishyura mu myaka ibiri, numva binejeje kandi bintera ishema. Ni ukuvuga ko umuntu wese washaka iyi plate atayibona kuko namaze kuyifata muri Leta ya New York yose..."

Avuga kandi ko hari umuzungukazi bigeze guhura bataziranye, akamushimira uburyo aterwa ishema n’igihugu cye ndetse akanamubwira ko nawe yigeze kuza mu Rwanda akahakunda cyane, kuburyo yifuza kuzahagaruka ari kumwe n’umuryango we bakamara igihe bahatemberera. Kugeza n’ubu, uwo muzungukazi ngo baracyavugana babaye inshuti bahujwe n’ikirango cy’imodoka ye.rdany.png

shug.pngfooter.gifshug2.png